Қазақ тілі мен әдебиеті, орыс тілі мен әдебиеті онкүндігі: екінші аптаның іс-шаралары

Қазақ тілі мен әдебиеті, орыс тілі мен әдебиеті онкүндігі:
екінші аптаның іс-шаралары
Мектепте қазақ тілі мен әдебиеті, орыс тілі мен әдебиеті онкүндігі аясында екінші апта мазмұнды әрі қызықты іс-шараларға толы болды. Апта бойы әр түрлі сынып оқушыларына арналған танымдық және шығармашылық шаралар ұйымдастырылды. Аталған іс-шаралардың негізгі мақсаты – тіл мен әдебиетке деген қызығушылықты арттыру, мәдени мұраға құрмет қалыптастыру және оқушылардың шығармашылық қабілеттерін дамыту.
2 наурыз күні 6–7 сынып оқушылары үшін қазақ тілі мен әдебиеті пәнінің мұғалімі Курмангожина Н.С. ұйымдастырған «Өлең – сөздің патшасы» атты әдеби қонақжай өтті. Іс-шара барысында оқушылар қазақ ақындарының өлеңдерін мәнерлеп оқып, өз әсерлерімен бөлісіп, шығармалардың мазмұны мен мағынасы туралы пікір алмасты. Оқушылар поэзия өнеріне қызығушылық танытып, мәнерлеп оқу шеберліктерін көрсетті.
3 наурыз күні 8-сынып оқушылары арасында қазақ тілі мен әдебиеті пәнінің мұғалімі Оспанова А.К. ұйымдастырған «Мемлекеттік тіл – менің болашағым» тақырыбында дебат өтті. Дебат барысында оқушылар мемлекеттік тілдің маңызы, оның қоғам өміріндегі рөлі және жас ұрпақтың болашағындағы орны туралы пікір алмасты. Оқушылар өз ойларын еркін жеткізіп, дәлелдер келтіріп, өз көзқарастарын қорғауға үйренді.
4 наурыз күні 5-сынып оқушылары үшін қазақ тілі мен әдебиеті пәнінің мұғалімі Оспанова А.К. дайындап өткізген «Тапқыр болсаң, тауып көр!» атты танымдық-ойын сайысы ұйымдастырылды. Оқушылар қызықты тапсырмаларды орындап, викторина сұрақтарына жауап беріп, жұмбақтар шешіп, тілдік ойындарға қатысты. Сайыс достық әрі көңілді атмосферада өтіп, оқушылар тапқырлықтары мен білімдерін көрсетті.
5 наурыз күні 9-сынып оқушылары қазақ тілі мен әдебиеті пәнінің мұғалімі Курмангожина Н.С. өткізген «Менің атым Қожа» шығармасы бойынша «Әдеби кейіпкерге сот» атты сыныптан тыс іс-шараға қатысты. Іс-шара сот отырысы форматында ұйымдастырылды. Оқушылар судья, адвокат, куәгер және басты кейіпкердің рөлдерін сомдады. Талқылау барысында оқушылар басты кейіпкердің іс-әрекеттерін талдап, адамгершілік құндылықтар туралы қорытынды жасады.
Онкүндігіміздің қорытындысында оқушылар белсенді қатысып, жетістіктері үшін грамоталармен марапатталды. Оқушылар түрлі іс-шараларда өз білімдерін, таланттарын және ынталарын көрсетті. Барлық қатысушыларды құттықтап, оқуда табыс пен жаңа жеңістер тілейміз.

Курмангожина Н.С.